KHAMOSH DIL KA DARD (Article)
written by Aneeqa Shoaib…
Kabhi kabhi hum sab se zyada muskurate hain na to sirf is liye ke koi yeh na samajh sake ke hum andar se kitne thakay hue hain.
Log kehte hain sab theek hai lekin sach yeh hota hai ke sab theek nahi hota.
Kuch baatein hoti hain jo hum kisi ko bata nahi sakte sirf apne andar daba kar rakh lete hain.
Mai aksar sochti hoon ke hum itni khamoshi kyun ikhtiyar kar lete hain.
Shayad is liye ke har baar jab hum bolte hain to koi sunta nahi ya phir samajhne ki koshish nahi karta.
Khamoshi phir aadat ban jati hai aur aadat dheere dheere bojh. Ek aisa bojh jo har roz dil par aur bhaari hota jata hai.
Zindagi mein kuch log bohot apne se lagte hain lekin waqt ke sath woh bhi door ho jate hain. Bina kisi wajah ke bina kisi jhagray ke bas achanak.
Aur hum sirf yahi sochte reh jate hain ke hum ne aisa kya kiya tha jo unhein rukne ka sabab na bana saka.
Kuch rishte sawalon par khatam ho jate hain aur un sawalon ke jawab kabhi nahi milte.
Or kuch rishte baghair sawal jawab ke hi khatam ho jate hain.Dard ka sab se mushkil hissa yeh hota hai ke hum usay bayan nahi kar sakte.
Agar ro dein to kamzor kehlate hain agar chup rahen to behis.
Is liye hum apne jazbaat lafzon mein qaid kar dete hain. Shayad is liye likhna itna zaroori ho jata hai. Likhtay hue lagta hai ke koi to hai jo bina tokay sun raha hai.Mai jaanti hoon ke har dard hamesha nahi rehta.
Waqt guzarta hai zakhm bhar jate hain lekin un ke nishaan reh jate hain. Woh nishaan humein yaad dilate rehte hain ke hum ne mehsoos kiya tha hum ne chaha tha aur hum ne toot kar bhi khud ko sambhala tha.
Shayad yahi zindagi hai. Thori si khushi thora sa dard aur bohot si khamoshi. Aur hum sab apni apni kahani le kar chalte rehte hain is umeed ke sath ke kabhi na kabhi koi humein bina kahe samajh lega.
“Dard dheere dheere us lamhe mein pighal jata hai jab koi humari khamoshi ko bhi muhabbat se samajh leta hai.”
The end….