Sehar e roshni by siraahA
Episode 25
Wo dono aaj saath mein samundar ke kinare chal rahi thi. Abhi sooraj ke ugne ka koi nam-o-nishaan nahi tha. Har taraf thandi hawayen ek mitha sa shor paida kar rahi thi.
Aise mein kisi khayal ke tehat Sehar ne Noor ki taraf rukh karke pucha
”Aapi… ek sawal hai. Nahi, do sawal… nahi nahi, yaar bohot saare sawal hain!” Wo is baat se confuse thi ki aakhir sawal kitne hain, aakhir mein ukta kar boli.
”Achha to tum pooch lo ek… nahi do… nahi nahi, bohot saare sawal!” Noor ne hasi chupate hue use apni ungliyon pe ginate hue chheda.
”Par sawal bohot saare hain… aaj jawab de dengi aap sabke?”
”Ab tum mujhe dara rahi ho! Dekho Sehar, mujhe Commerce ka ‘C’ bhi nahi aata… I am a Psychology student.”
”Arey nahi na Aapi! Wo to mujhe bhi nahi aata, so don’t worry.”
”Aha, wow! Ek to tum topper log maante kyun nahi ho?” Noor ne muskurate hue kaha.
’Topper’ sunte hi Sehar ke chehre ki hasi ekdam se feeki pad gayi. Uske zehn mein ekdum se wo manzar ubhra jab use Zaahira ka call aaya tha.
”Sehar, tumhara result aa gaya!”
”Achha Mumma! Kya aaya?” usne khushi chupate hue pucha tha. Use maloom tha ki wo Class mein First hi aayi hogi. Wo itne dinon mein pehli baar itni excited hui thi!Magar Zaahira ke agle alfaz ne uske chehre ki raunaq hi chheen li
”Ok, Allah Hafiz…”
Usne dheere se phone kaan se hataya aur wahi farsh par baith gayi.
”2nd?! Kaise Allah… 2nd kaise?! Wo bhi itne bade margin se?!” Uski aankhon se aansu behne lage.
”Ye sab… ye sab us Daniyal ki wajah se hua hai… Sab uski wajah se!” Uski aankhon mein ekdam se nafrat bhar aayi.
”Kahan kho gayi…?” Noor ne use kahi gum dekh kar uske kandhe par haath rakha.
”Nahi… kahin nahi,” usne chehre par ek muskaan laani chahi, lekin gale mein jaise kante mehsus hue.
”Achha, tum pucho apne sawal.”
”Haan, to mera pehla sawal yeh hai ki…” usne khud ko compose karte hue kaha.
”Achha, ek jagah baith jaate hain, phir tum yeh session start karna, okay?”
”Oh, okay!” usne halke se haste hue kaha.
Wo dono samundar ke kinare ek jagah aamne-saamne baith gayi. Hawaon se Sehar ke khule lambe baal ud rahe the, kandhon par shawl thi, aur chehra ab pehle ke muqable pur-sukoon tha. Noor aaj bhi apne burqe mein thi, uski hari aankhein naqab se jhalak rahi thi.
”To sabse pehle mujhe yeh batayein ki… hum sab jaante hain na ki ‘Allah jise chahe hidayat deta hai aur jise chahe gumrah rehne deta hai’, right?”
“Haan, beshak.”
”Lekin ek Hadees ka mafhoom yeh bhi hai ki ‘Hidayat use hi milti hai jo hidayat chahta hai’, right?”
”Haan, right.”
”Then yeh kaisa connection hai? Agar kisi insaan ke liye Allah ne chaha hi nahi ki use hidayat mile, toh uske gumrah hone mein uski kya galti? Aur agar yeh baat hai ki jo chahega use hi hidayat milegi, toh phir ismein Allah ki chah kaise hui?” Wo apne hi sawal mein ulajh gayi thi.
”Umm… kafi interesting sawal hai. Dekho, jawab tumhare sawal ke andar hi hai!” Noor ne muskurate hue kaha. “Dekho, isko samjhane ke kafi tareeqe hain, par main tumhe apne hisab se sabse aasan tareeqe se samjhane ki koshish karungi.”
”Okay Aapi!”
”Toh assume karo, ek company ne ek advertisement nikala aur usmein unhone ek lottery rakhi jiska inam ek trip hoga, okay?”
”Well, okay.”
”Ab us lottery mein participate karne ke liye kai log ek open area mein ikhatte hue. Aur jo insaan winners choose karega, wo ek oonchi jagah pe hai jahan se use sab koi dikh raha hai.”
”Ahaan, okay,” usne samajhne ke andaz mein sar haan mein hilaya.
”Ab us lottery ke winners kisi blind chit game se nahi decide honge. Wo shakhs un logon ke shauq, unki tarrp, aur unke mizaaj ko dekh kar unhe select karega jo waqai wahan dil se khade hain. Samajh aayi meri baat?”
”I get it! Us shakhs ke hath mein hai ki wo kise choose kare aur kise nahi… jaise Allah ke hath mein hai ki wo kise hidayat dein aur kise nahi.”
”Absolutely correct! Ab dekho, wo ad toh kitne logon ne dekha hoga na, lekin kya sabne aakar participate kiya hoga?”
”Nahi Aapi, har koi interested nahi hota.”
“Bilkul! Har koi nahi chahta, aur isme us choose karne wale ki kya galti? Usne to sabke liye hi offer diya tha. Well, ab ek baat batao… us open area ke samne se ek rasta ja raha hai aur wahan se ek random person guzar raha hai jise us lottery mein koi interest nahi hai. Ab us choose karne wale admi ko wo dikh raha hai, toh kya ab wo use choose kar sakta hai?”
”Well nahi… kyunki us shakhs ko toh interest hi nahi hai! Aur wahan toh itne log hain jo interested hain, umeed lagaye baithe hain. Lottery toh unhi ko mil sakti hai jo chahte hain.”
”Lo, jawab mil gaya!” Aakhir mein Noor ne pur-sukoon andaz mein baithte hue kaha.
”Huh?” Sehar ek pal ko ruki aur phir… “Ohhhhh! Aapi I get it! Matlab ki us ad ki tarah Allah Tala ne bhi apna paigham pohchaya, apne Nabiyon ke zariye. Ab yeh Allah ki chah thi, lekin use maanna aur na maanna, yeh logon ki chah thi. Toh jo log chahte the unhone participate kiya, aur jo nahi chahte the unhone nahi kiya! Lekin jinhone participate kiya, wo bhi isliye kar paye kyunki lottery ka offer aaya tha! Yaani ki Allah ki chah ke bina kuch mumkin nahi.”
”Bilkul! Yahi baat hai. Har cheez ek jagah se shuru hoti hai aur wahin aake khatam hoti hai
ALLAH KI CHAH. Aur baat rahi gumrah ki, to wo unki galti hai ki unhone un tak aaye paigham ko jhutlaya.”Noor ne aage samjhaya:
”Quran Majeed mein Allah farmate hain:
’Aur jo log hidayat ki raah ikhtiyar karte hain, Allah unki hidayat aur badha deta hai.’
(Surah Muhammad 47:17)
Aur dusri taraf:
’Allah gumrah nahi karta magar faasiq logon ko.’
(Surah Al-Baqarah 2:26)
Yaani Allah ki ‘gumrah karne’ ki sunnat yeh nahi ke bina wajah kisi ko gumrah kar de, balki jab banda baar baar haq se munh modta hai, takabbur karta hai, daleel ke bawajood qabool nahi karta, to Allah uske dil ko usi raaste par chhod deta hai jo usne khud pasand kiya. Hidayat paane ke liye bande ko bhi koshish karni hoti hai, participate karna padta hai. Aisa nahi ki wo soche ek din subah uthega aur use hidayat mil jaegi! Hamari yahi to galti hai, hum khud se kuch nahi karte aur phir sara blame Allah pe daal dete hain.”
”Jii Aapi…” usne sharmindagi se sar niche jhuka liya.
”Achha, agla sawal?”
”Oh okay, wo bhi isi tarah ka hai lekin thoda alag hai.”
”Okay, pucho.”
”Umm… kehte hain ki hamari taqdeer is zameen o aasman ke banne se bhi kai saal pehle likh di gayi thi! Yaani ki sab kuch jaise paida hona, kahan paida hona, maa-baap, bhai-behen, shadi, bachhe, kamyabi aur maut …..sab kuch pehle hi likh diya gaya hai?”
”Hmm, bilkul.”
“Phir dusri taraf yeh bhi hai ki Dua se naseeb badal jata hai. Hum shiddat se dua maangein to Allah naseeb badalne par bhi Qadeer hai!”
”Beshak, dua se naseeb badal jaate hain.”
”Aur dua ki chah bhi Allah hi daalte hain dil mein. Like unki raza ke bina hum kisi cheez ko maang bhi nahi sakte, right?”
”Haan, tumhe khud to sab pata hai Sehar, phir ab kya poochna hai?” Noor ne has kar bola.
”Nahi Aapi, uljhi hui hoon main kai jagah pe… Jaise agar Allah ne hamare dil mein kisi cheez ki chah daali hai, toh isliye daali hogi na ki hum dua maang ke use apna naseeb bana lein? Toh wo cheez Allah ne pehle hi taqdeer mein kyun nahi likh di? Unhe to pata hoga na ki wo likha hua badal jaega?”
”Umm, all right! Ek baat batao, kya har maangi hui dua qbool hoti hai?”
”Nhi… kuch kharij (reject) bhi kar di jaati hain.”
”Nahi! Duaen kabhi kharij nahi hoti hain. Main tumhe aage bataungi ki dua ke saath kya hota hai.”
”Okay…”
”Ab baat rahi ki jab dua ke zariye Allah ko dena hi tha kisi cheez ko, toh pehle hi naseeb mein kyun nahi daal diya? Iska jawab yeh hai bacche… ki Allah hamari taqdeer apne hisab se, apni hiqmat se likhte hain. Usse behtar hamare liye kuch bhi nahi hai. Lekin baaz dafa Allah kuch alternates bhi paida karte hain jo tumhari zindagi mein aate hain, aur unki chah tumhare dil mein daal di jaati hai.
Ab agar tumne use shiddat se maanga, sabr aur tawaqqul kiya, toh Allah us dua ko qbool kar lenge. Lekin agar tumne dua us qadr nahi maangi jis qadr Allah chahte the ki tum maango, toh phir wahi cheez rehti hai jo Allah ne pehle likhi hoti hai. Aur beshak wo tumhare liye behtar hoti hai!”
”Achha… aur jab hum ro-ro kar maangein, sabr karein, tawaqqul karein par phir bhi na mile… tab?”
”Har dafa Allah hamare dil mein dua isliye nahi daalta ki use pura karna hai… balki isliye bhi daalta hai taaki hum us dua ko maangne ki aarzoo mein, uski tadap mein Allah ke qareeb ho jayein!
Sehar, kai dafa hum insaan kisi ki mohabbat mein itna mubtala ho jaate hain ki Allah ko bhula dete hain. Kai dafa wo insaan bura hota hai, kai dafa achha…
‘Lekin jis dil mein Allah ki mohabbat se zyada insanon ki mohabbat ho, wo dil kabhi sukoon nahi pata.’
Aise mein phir Allah hamare dil mein unhe maangne ki chah daalte hain aur phir unhe hamari zindagi se nikal dete hain. Hum mayoos ho kar baith jaate hain, magar baad mein realize hota hai ki Allah to hamein bacha rahe the! Aise hi hum kai dafa galat cheezon ki chah kar lete hain aur Allah aisa hone dete hain taaki hamein duniya se bezaar kar dein. Hum ro-ro kar use apne liye maangte hain, magar wo cheez hamein nahi milti aur phir hum Allah ko koste hain, unse badgumaan ho jaate hain… jabki Allah ne to hamein kisi badi burai se bachaya hota hai.”
”Toh yaani har dafa dua khud puri hone ke liye nahi… balki hamein ‘pura’ karne ke liye hoti hai,” Sehar ne pur-sukoon ho kar bola.
”Bilkul! Tumhe pata hai, ek momin ka sabse bada hathiyar uski ‘Dua’ hai.
DUA WO ARZI HAI JO US JAGAH LAGTI HAI JAHAN SE ARZIYAN KHALI HAATH NAHI LAUTAYI JATIIN.Achha, agla sawal?” Noor ne pucha.
”Ruko Sehar, agle sawal se pehle… maine kaha tha na ki main tumhein bataungi ki hum jo duaen maangte hain, unke sath kya hota hai?” Noor ne mudte hue samundar ki chalti lehron ko dekha.
”Haan Aapi, aapne kaha tha ki duaen kabhi kharij nahi hotiin.”
”Bilkul. Ek Hadees ka mafhoom hai ki jab ek momin Allah se dua maangta hai aur us dua mein koi gunah ya rishta todne ki baat nahi hoti, toh Allah Tala uski dua ko zaya nahi karte. Wo teen tareeqon se qbool hoti hai.” Noor ne apni teen ungliyan utha kar samjhaya.
”Teen tareeqon se?” Sehar ne apni shawl ko theek karte hue pucha.
”Haan!
Pehla tareeqa: Jo tumne maanga, Allah ne tumhein is duniya mein wahi cheez usi waqt de di, kyunki wo tumhare liye bilkul sahi waqt tha.
Dusra tareeqa: Jo tumne maanga, ho sakta hai wo cheez tumhein is duniya mein nahi mili, par us dua ke badle Allah ne tum par aane wali kisi bohot badi musibat ya aafat ko taal diya. Yaani tum maang kuch aur rahi thi, par Allah ne us dua ki taqat se tumhein kisi dukh se bacha liya.
Teesra aur sabse khubsoorat tareeqa: Jo tumne maanga, wo na toh tumhein mila aur na hi koi aafat tali… balki Allah ne us dua ko Aakhirat ke liye ek khazana aur tohfa bana kar save kar liya!
Tumhein pata hai Sehar, Qayamat ke din jab ek insaan ko uski un duaon ka thikana aur inaam milega jo duniya mein poori nahi hui thi, toh wo ro padega! Wo kahega ‘Kaash! Duniya mein meri koi ek bhi dua poori na hui hoti, aur sab aaj ke din ke liye bacha li gayi hoti!'”
Noor ne apni baat khatam ki toh Sehar ki aankhon mein ek ajeeb sa sukoon tha. Uska dil bilkul halka ho gaya tha.
”Yaani Aapi… hamara maangna kabhi bekaar nahi jata?”
“Kabhi nahi, Sehar. Bas hamara tawaqqul kamzor pad jata hai. Ab batao! Koi aur sawal?”
”Nahi Aapi, aaj ke liye itna kafi hai. Thanks! Aapse baat karke mere kai sawalon ke jawab mil jaate hain.”
”Tum behen ho meri, ‘thanks’ na bola karo,” Noor ne apne haathon se uske chehre ko narmi se chhootey hue kaha.
Aur Sehar bas khil kar muskura di…
Baaz dafa hamari zindagi se khas log chale jaate hain, aur hum sochte hain shayad hum unhe deserve nahi karte the. Lekin asal mein Allah un logon ko nikal kar unki jagah hamein aise log ata karta hai jo hamein pura kar dete hain!
Bas hamein sahi waqt ka intezar karna hota hai.
(To be continued…)