ریگزار کا گنہگار
از قلم محمد حماد علی گورسی
شام ڈھل رہی تھی۔ سورج افق کے کنارے پر انگارے کی طرح دہک رہا تھا اور اس کی سرخی پورے قصبے پر پھیلی ہوئی تھی۔ کچی سڑک پر گھوڑوں کے سموں سے اڑی ہوئی گرد ابھی تک فضا میں معلق تھی۔ لکڑی کی بنی دکانوں کے سائن بورڈ ہوا کے جھونکوں سے چرچرا رہے تھے۔ دور اصطبل سے گھوڑوں کی ہنہناہٹ سنائی دے رہی تھی، جبکہ سارا قصبہ غیر معمولی خاموشی میں ڈوبا ہوا تھا۔ ہوا میں بارود، پسینے اور گرد کی ملی جلی بو تیر رہی تھی۔
اسی خاموشی کے درمیان ایک گھوڑا قصبے کی مرکزی سڑک پر آ کر رکا۔ اس کی پیٹھ پر بیٹھا شخص سیاہ کوٹ اور چوڑی ٹوپی پہنے ہوئے تھا۔ اس کی بڑی سرخ آنکھیں ٹوپی سے چھپی ہوئی تھیں۔ اس کے رخسار ڈھلتی شام کے سورج جیسے سرخ تھے اور غصے سے وہ اپنے ہونٹ بھینچ رہا تھا۔ اس نے رک کر اپنا سر اٹھایا اور آ کر سامنے والی دکان پر اپنی نظریں جما دیں۔
دکان سے ایک دوسرا آدمی، “چارلی” (Charlie) ، باہر نکلا۔ اس کے چہرے پر عجیب سا اعتماد تھا، جیسے اسے کسی خطرے کا احساس ہی نہ ہو۔ دونوں کی نظریں ملیں اور کافی دیر تک ایک دوسرے کی آنکھوں میں آنکھیں ڈالے گھورتے رہے۔ چند لمحوں تک کوئی کچھ نہ بولا۔
“آخر تم آ ہی گئے۔”
دکان سے نکلنے والے شخص، چارلی، نے ہلکی مسکراہٹ کے ساتھ کہا۔
“بارہ سال پہلے اپنے باپ سے جو وعدہ کیا تھا، وہ پورا کرنے آیا ہوں۔۔۔ آج اس کا بدلہ لینے آیا ہوں۔”
گھوڑے پر بیٹھے “جیک” (Jack) نے سرد لہجے میں جواب دیا۔ اس کی آنکھوں میں خون اتر آیا اور آج سے بارہ سال پہلے کا منظر ایک بار پھر اس کی آنکھوں میں گھوم گیا، اور پھر آخرکار وہ دن آ پہنچا جس کا وہ بارہ برس سے انتظار کر رہا تھا۔ اپنے باپ کے خون کا حساب چکانے کا دن۔
یہ کہتے ہوئے وہ اپنے گھوڑے سے اترا۔ چارلی بھی فوراً ہوشیار ہوا اور جیب سے اپنی پستول نکال لی۔ کچھ ہی لمحوں بعد دونوں جانب سے فائرنگ شروع ہو گئی۔ فائرنگ اس قدر شدید تھی کہ کوئی بھی روکنے کے لیے آگے نہ بڑھا۔ لوگوں نے اپنے گھروں کے دروازے بند کر لیے اور کنڈیاں چڑھا لیں۔ دکانداروں نے اپنی دکانوں کے شٹر نیچے گرا دیے۔
کافی دیر تک فائرنگ جاری رہی، پھر ایک گولی چارلی کے سینے کو چیرتی ہوئی نکل گئی۔ وہ پیچھے کی طرف زمین پر گرا اور اس کے جسم سے خون بہنے لگا۔ گولیاں صرف سینہ نہیں چیرتی بلکہ وہ نسلوں کو بھی چیر دیتی ہیں۔
جیک نے اپنی پستول دوبارہ بھری اور چارلی کے پاس بیٹھ گیا۔ اس نے اس کے سر پر پستول تانتے ہوئے کہا:
“آج اپنے باپ کے قتل کا قرض اتارنے آیا ہوں، اور پورا قرض چکا کر ہی لوٹوں گا۔”
یہ کہہ کر اس نے پستول کی پوری میگزین اس کے سر میں خالی کر دی۔ چارلی کے سر کے دونوں جانب سوراخ ہو گئے۔ وہ اسی لمحے ہلاک ہو گیا اور اس کے خون کے چھینٹے اُڑتے ہوئے جیک کے چہرے پر پڑے۔
جیک اُٹھا، اپنے ہتھیار سنبھالے، گھوڑے پر سوار ہوا اور قصبے سے میلوں دور پہاڑوں کے دامن میں موجود غار کی طرف روانہ ہوا، جہاں جیک اکثر جایا کرتا تھا۔
✯✯✯✯✯
بارہ سال پہلے
(1802ء)
بارہ سال پہلے کی بات ہے۔ صبح کی نرم دھوپ وادی پر بکھر رہی تھی۔ رات کی ٹھنڈی ہوا کے آثار ابھی تک فضا میں موجود تھے اور گھاس کے پتوں پر شبنم کے قطرے موتیوں کی طرح چمک رہے تھے۔ دور دور تک پھیلے میدان سورج کی سنہری کرنوں سے روشن ہو رہے تھے۔ چند پرندے آسمان پر چکر لگا رہے تھے جبکہ کہیں کہیں گھوڑوں کی ہلکی ہنہناہٹ سنائی دے رہی تھی۔ فارم کے باہر ایک دس سالہ لڑکا “جیک” اپنے باپ “کول” (Cole) کے ساتھ لکڑیاں اکٹھی کر رہا تھا۔
“ابّا! ہماری زمینیں کب واپس ملیں گی؟ ہم ان پر پھر سے کھیتی کب شروع کریں گے؟”
جیک نے نہایت معصومیت سے پوچھا تھا۔
“میں نہیں جانتا کول۔۔۔ ہماری زمینیں چھِن چُکی ہیں اور دشمن نے سرکار کو بھی پیسہ کھلا کر چپ کروا دیا ہے۔”
کول نے ناامیدی کے ساتھ مختصر سا جواب دیا۔
زمینوں کا مسئلہ نسل در نسل چلتا رہتا ہے، نسل در نسل فسادات آگے بڑھتے رہتے ہیں، ان زمینوں کی خاطر جو اللہ کی ہیں، اور ہم اس پر حاکم بنے ہوئے ہیں۔
“آہ ابّا! مجھے آپ کے ساتھ کھیتی کرنے میں بہت مزہ آتا تھا۔”
جیک بہت مایوسی کے ساتھ بولا۔
” جیک بیٹے! میں بھی اب بہت نااُمید ہو گیا ہوں۔ تم میرے ایک ہی وارث ہو اس لئے تمہیں سب کچھ بتاتا ہوں کہ اگر مجھے کل کو کچھ ہو جائے تو تمہیں سب کچھ معلوم ہو۔”
کول لکڑیاں نیچے رکھ کر جیک کے سر پر ہاتھ رکھتے ہوئے بولا۔ ماں باپ کو اولاد کی کتنی فکر ہوتی ہے نا پہلے ان کے بچپن کی اور پھر جب وہ تھوڑے بڑے ہوتے ہیں تو اس بات کی کہ انہیں وہ سب سِکھا دیں جو ان کی زندگی میں کام آئے گا تاکہ ان کو کوئی مشکل نہ ہو۔
“ابّا آپ نااُمید نہ ہوں۔ کل ہمیں سکول میں ٹیچر بتا رہے تھے کہ ‘انسان کو کبھی بھی نااُمید نہیں ہونا چاہیے اور نہ ہی اپنے رب سے اُمید چھوڑنی چاہیے، ہمیں اُس پر یقین رکھنا چاہیے اور اُمید رکھنی چاہیے کہ وہ سب کچھ بہتر کر دے گا اور بےشک وہی سب کچھ بہتر کرنے والا ہے۔’ تو آپ بھی بس اُمید نہ چھوڑیں۔”
جیک اپنے باپ کو بڑے دانشمندی سے سمجھا رہا تھا۔
“ہاں بیٹے۔۔۔۔ مجھے فخر ہے کہ میں تم جیسے بیٹے کا باپ ہوں۔”
کول آگے بڑھ کر جیک کا ماتھا چومتے ہوئے بولا
“ابّا ہمارے دشمن کا نام کیا ہے؟”
جیک نے تجسس کے ساتھ پوچھا۔
“چارلی۔۔۔۔ چارلی ہے ہمارے دشمن کا نام۔۔ جس نے ہماری زمینوں ، دکانوں اور گھر پر قبضہ کیا ہے اور سرکار کو پیسہ کھلا کر معاملہ ختم کروا دیا ہے۔”
یہ کہتے ہوئے اس کی نظریں دور اُفق پر جا ٹھہریں۔ وہ چند لمحوں کے لیے خیالوں میں گُم ہو گیا، جیسے ماضی کے کسی بھولے بسرے منظر کو دوبارہ دیکھ رہا ہو۔ اس کا لہجہ دھیمہ پڑ گیا۔ وہ خلاؤں میں تکتے ہوئے ماضی کے اوراق پلٹنے لگا۔ خاموشی ٹوٹی اور جیک بولا۔
“ابّا میں بڑے ہو کر اس سے زمینیں واپس لوں گا۔”
اس کے ذہن میں ماضی کی کھلی پرانی کتابیں بند ہوئیں اور وہ کول کی طرف دیکھتے ہوئے مسکراتے ہوئے کہنے لگا۔
“ٹھیک ہے میرے بچے۔۔۔ ٹھیک ہے۔۔”
✯✯✯✯✯
چند دن بعد
دوپہر کا وقت تھا۔ سورج وسیع میدانوں پر آگ برسا رہا تھا۔ پورا قصبہ گرمی سے بچنے کے لیے اپنے گھروں میں دبکا ہوا تھا اور تاجروں کا کام بھی اس وقت ماند پڑ چکا تھا۔ کول تپتی دھوپ میں اپنے بیٹے جیک کو سکول سے لینے جا رہا تھا۔
“ابّا! آج آپ کو اتنی دیر کیوں ہو گئی؟ میں کافی دیر سے انتظار کر رہا تھا۔”
اسکول کے باہر اکیلا بیٹھا جیک اپنے والد کو دیکھتے ہی اُٹھا اور اس سے لپٹ گیا۔
“معذرت، میرے بچے۔ آئندہ کوشش کروں گا کہ وقت پر آؤں۔”
کول نے مسکراتے ہوئے جیک کا ہاتھ تھاما اور دونوں گھر کی طرف روانہ ہو گئے۔
“ابّا، آج آپ معمول سے زیادہ دیر سے کیوں آئے؟”
جیک نے اپنے باپ کی انگلی مزید مضبوطی سے پکڑتے ہوئے پوچھا۔
“بیٹا، پریشانیاں اتنی بڑھ گئی ہیں کہ ذہن ہر وقت انہی میں الجھا رہتا ہے۔ مجھے وقت کا احساس ہی نہ رہا۔ جب اچانک تمہارا خیال آیا تو میں فوراً سکول کی طرف بھاگا۔ راستے بھر دل گھبراتا رہا کہ کہیں تم اکیلے پریشان نہ ہو رہے ہو۔”
کول نے ہلکی سی مسکراہٹ کے ساتھ جواب دیا، مگر اس کی آنکھوں میں چھپی فکر واضح محسوس ہو رہی تھی۔
ایسے ہی باتیں کرتے کرتے وہ گھر کی طرف بڑھتے رہے۔ جیک اور کول ابھی قصبے سے کچھ ہی فاصلے پر تھے کہ اچانک گھوڑوں کے سموں کی آواز فضا میں گونجنے لگی۔ آواز ہر گزرتے لمحے کے ساتھ قریب آتی جا رہی تھی۔ دور مٹی کا ایک بادل اُٹھ رہا تھا، اور اس بادل کے درمیان ایک گھڑ سوار ان کی طرف بڑھتے دکھائی دے رہا تھا۔
جیک اور کول قصبے کے مرکزی چوک پر پہنچے تو اتنی ہی دیر میں گھڑ سوار بھی وہاں پہنچ چکا تھا۔ گھڑ سوار نے سیاہ رنگ کا کوٹ اور گہرے میرون رنگ کی ٹوپی پہن رکھی تھی اور منہ پر کالا رومال باندھے ہوئے تھا جس کی وجہ سے اس کا چہرہ نہ دکھ سکا۔
“کول میں تمہیں خبردار کرنے آیا ہوں کہ اپنا مقدمہ واپس لے لو۔ ویسے بھی اب سب کچھ ہمارے قبضے میں ہے یہاں تک کہ حکومت بھی کچھ نہیں کر سکتی تو تمہارا فائدہ اسی میں ہے کہ تم مقدمہ واپس لے لو۔”
کول نے اس شخص کی آواز سے اسے فوراً پہچان لیا۔ کول کے چہرے پر ایک تلخ مسکراہٹ اُبھری۔ اس کی آنکھوں میں برسوں کی محرومی، غصہ اور نفرت سمٹ آئی تھی۔ اس نے جیک کا ہاتھ مضبوطی سے تھام لیا اور سیدھا اس شخص کی آنکھوں میں دیکھنے لگا، جیسے اسے کسی انجام کا خوف ہی نہ ہو۔
“اوہ! تو یہ تم ہو۔”
اس نے حقارت سے کہا۔
“تو پھر سن لو ، میں مرتے دم تک مقدمہ واپس نہیں لوں گا۔”
کول نے ہلکا سا قہقہہ لگایا۔
“تو پھر تم اپنے مرنے کا انتظار کرو۔۔۔ تمہاری موت قریب ہے اور جلد تم سے آ ملے گی۔”
اس نے یہ کہتے ہی سرخ آنکھوں سے کول کو دیکھا اور پھر گھوڑے کو ایڑ لگائی اور روانہ ہو گیا۔
جیک اس کی یہ بات سن کر مکمل طور پر سہم چکا تھا۔ اس کا چہرہ زرد پڑ گیا تھا اور دل خوف سے تیزی سے دھڑکنے لگا تھا۔
“ابّا! یہ شخص کون تھا؟۔۔۔ اور اس نے آپ کو مارنے کی دھمکی کیوں دی؟”
جیک کول کی ٹانگوں سے لپٹتے ہوئے بولا۔ اس کی آواز میں خوف صاف جھلک رہا تھا۔
“یہ چارلی تھا۔”
کول نے گہری سانس لیتے ہوئے جواب دیا۔ اس کی نظریں ابھی تک دور جاتی ہوئی گرد پر جمی تھیں۔
“چارلی!”
جیک کی آنکھیں حیرت سے پھیل گئیں۔
“ہاں، چارلی۔۔۔ وہی چارلی جس نے ہماری ہر شے پر قبضہ کر رکھا ہے۔۔۔”
کول نے دانت بھینچتے ہوئے کہا۔ اس کے لہجے میں برسوں کا غصہ اور بے بسی چھپی ہوئی تھی۔
“ابّا، خدا کے لیے مقدمہ واپس لے لیں۔ اگر اس کے پاس اتنی طاقت ہے کہ حکومت بھی اس کا کچھ نہیں بگاڑ سکتی تو ہم کیا کر لیں گے؟ مجھے ہماری زمینیں نہیں چاہئیں، مجھے صرف آپ چاہئیں۔”
جیک نے گھبرائے ہوئے انداز میں کہا۔ وہ اپنے باپ کو کھونے کے تصور سے ہی کانپ اُٹھا تھا۔ اس نے بے اختیار اپنے باپ کا ہاتھ مضبوطی سے تھام لیا، جیسے اسے کسی خطرے سے بچانا چاہتا ہو۔
کول چند لمحے خاموش رہا۔ اس کے چہرے پر ایک اداس مسکراہٹ اُبھری۔ اس نے جھُک کر جیک کے کندھے پر ہاتھ رکھا اور محبت بھری نگاہوں سے اسے دیکھا۔ اس کی آنکھوں میں باپ کی شفقت بھی تھی اور ایک ایسے انسان کا عزم بھی جو ظُلم کے آگے جھکنے کے لیے تیار نہ ہو۔
✯✯✯✯✯
صبح کا وقت تھا۔ سورج آہستہ آہستہ اُفق سے اُبھر رہا تھا اور اس کی سنہری کِرنیں وادی پر بکھر رہی تھیں۔ درختوں کی شاخوں سے شبنم کے قطرے ٹپک کر زمین پر گر رہے تھے۔ پرندے چہچہا رہے تھے اور اصطبل میں بندھے گھوڑے بے چینی سے اپنے دن کے آغاز کا انتظار کر رہے تھے۔ ٹھنڈی ہوا کے نرم جھونکے فارم کے اردگرد پھیلی خاموشی میں زندگی گھول رہے تھے۔
کول لکڑی کے بنے چھوٹے سے برآمدے میں بیٹھا اخبار پڑھ رہا تھا۔ اِتنے میں جیک ایک تھال میں چائے کی دو پیالیاں رکھے وہاں آ پہنچا۔
“ابّا! یہ لیجیے، آپ کی چائے۔”
جیک نے مسکراتے ہوئے تھال میز پر رکھا۔
کول نے اخبار تہہ کیا اور مسکرا کر اپنے بیٹے کی طرف دیکھا۔
“ارے بیٹا، تمہیں کیسے معلوم ہوا کہ مجھے چائے کی طلب ہو رہی تھی؟”
“بس ابّا، آپ سے محبت اتنی ہے کہ آپ کی ہر ضرورت پہلے ہی معلوم ہو جاتی ہے۔”
جیک نے شرارت بھرے لہجے میں جواب دیا۔
کول ہنس پڑا۔ اس نے آگے بڑھ کراپنی پیالی اٹھائی۔
چند لمحے خاموشی سے گزرے۔ دونوں باپ بیٹا چائے پیتے رہے۔ پھر اچانک کول کا چہرہ سنجیدہ ہو گیا۔
“جیک بیٹا…”
اس نے دھیمے لہجے میں پکارا۔
“جی ابّا؟”
جیک نے اپنی کرسی اس کے قریب کِھسکا لی۔
کول چند لمحے خاموش رہا۔ اس کی نظریں دور میدانوں میں کہیں گم تھیں۔ کچھ پل بعد خاموشی ٹوٹی اور کول بولا۔
“اگر کبھی میں تمہارے ساتھ نہ رہوں… تو تم اپنا خیال رکھ لو گے نا؟”
جیک کے چہرے کی مسکراہٹ یکدم غائب ہو گئی۔ اس کی آنکھیں حیرت اور خوف سے پھیل گئیں۔ اس کے ہاتھ کانپنے لگے اور ہاتھ میں پکڑی چائے کی پیالی اچانک اس کی گرفت سے چھوٹ کر زمین پر جا گری۔
پیالی ٹوٹ گئی۔
چائے لکڑی کے فرش پر پھیلنے لگی جبکہ اس کے ٹکڑے اِدھر اُدھر بکھر گئے۔
“ابّا!”
جیک گھبرا کر اپنی جگہ سے اٹھا۔
“آپ ایسی باتیں کیوں کر رہے ہیں؟”
اس کی آواز لرز رہی تھی۔
“آپ اپنا مقدمہ واپس لے لیں۔ میرے لیے ہی سہی۔ میرے پاس آپ کے علاوہ کوئی نہیں ہے۔ اگر آپ کو کچھ ہو گیا تو میں کہاں جاؤں گا؟”
یہ کہتے کہتے اس کی آنکھیں آنسوؤں سے بھر گئیں۔
کول نے چند لمحے خاموشی سے اپنے بیٹے کو دیکھا۔ پھر آہستہ سے اُٹھا، اس کے قریب آیا اور اسے اپنے سینے سے لگا لیا۔
“بیٹے، بعض اوقات آدمی کے پاس دو ہی راستے ہوتے ہیں؛ یا تو ظلم کے سامنے سر جھکا دے یا پھر حق کے لیے ڈٹا رہے۔”
کول کی آواز میں عجیب سی تھکن تھی۔
“اور میں نے حق کے لیے کھڑے رہنے کا راستہ چنا ہے۔”
جیک نے اپنے باپ کو مزید مضبوطی سے تھام لیا، جیسے اسے کھونے کے خیال سے ہی ڈر گیا ہو۔
کول نے اس کے سر پر ہاتھ پھیرا اور خاموشی سے دور اُفق کی طرف دیکھنے لگا۔ سورج اب آسمان پر بلند ہو چکا تھا، مگر نہ جانے کیوں اس کے دل میں شام اُترنے لگی تھی۔
وہ دیر تک اپنے بیٹے کو دیکھتا رہا، جیسے اس کے چہرے کو اپنی یادوں میں ہمیشہ کے لیے محفوظ کر لینا چاہتا ہو۔
اسے کیا معلوم تھا کہ یہ اس کے بیٹے کے ساتھ اس کی آخری پُرسکون صبح تھی۔
✯✯✯✯✯
شام ڈھلنے لگی تھی۔ سورج آہستہ آہستہ اُفق کے پیچھے اُتر رہا تھا اور سنہری روشنی میدانوں پر پھیلتی جا رہی تھی۔ کول اور جیک گھر کے باہر بیٹھے تھے۔ چند دن پہلے چارلی سے ہونے والی ملاقات کے باوجود کول نے خود کو پُرسکون ظاہر کرنے کی کوشش کر رہا تھا ، مگر اس کے چہرے پر چھپی بے چینی جیک سے پوشیدہ نہ تھی۔
اچانک دور سے گھوڑوں کے سموں کی آواز سنائی دی۔ کول کا چہرہ سخت ہو گیا۔ آواز تیزی سے قریب آ رہی تھی۔ چند لمحوں بعد پانچ گھڑ سوار ان کے گھر کے سامنے آ کر رُکے۔ درمیان میں چارلی تھا۔ اس کے ہونٹوں پر وہی تکبّر بھری مسکراہٹ موجود تھی۔
“لگتا ہے میری بات تمہاری سمجھ میں نہیں آئی، کول۔”
چارلی گھوڑے سے اترتے ہوئے بولا۔
کول آہستہ آہستہ کھڑا ہو گیا اور جیک کو اپنے پیچھے کر لیا۔
فضا میں ایک ایسی خاموشی پھیل گئی جس میں آنے والے طوفان کی چاپ صاف سنائی دے رہی تھی۔
“آخری مرتبہ پوچھ رہا ہوں کہ کیا تم مقدمہ واپس لو گے؟”
چارلی نے کول کے سر پر بندوق تان کر اس سے آخری مرتبہ پوچھا۔
“ابّا خدا کے لئے مقدمہ لے لیں۔ میرا آپ کے سوا کوئی نہیں ہے میں کیا کروں گا۔”
جیک روتے ہوئے اپنے باپ سے اِلتجا کر رہا تھا۔
“نہیں۔ بالکل نہیں۔ میں مرتا ہوں تو مر جاؤں لیکن یہ مقدمہ تاریخ کی کتابوں میں ہمیشہ رہے گا۔”
کول ضد پر اُتر آیا تھا اور ڈٹ کر چارلی کے سامنے کھڑا تھا۔
“ابّا ! میں کیا کروں گا؟”
جیک کے منہ سے جملہ نِکلا اور ساتھ ہی چارلی کی بندوق چلی اور سیدھا ایک گولی کول کے سر کو چیرتے ہوئے نکلی۔ گولی اِتنی تیز چلی تھی کہ کول کے سر کے دونوں طرف سوراخ ہو گئے۔ وہ زمین پر گرا اور اس کے منہ سے آخری الفاظ نکلے جو کہ جیک کے سوال کا جواب تھے۔
“جیک! تم میرا بدلہ لینا ، میرا خون معاف نہ کرنا۔”
کول نے یہ کہا اور وہیں دم توڑ گیا۔ گھڑسواروں نے اپنے گھوڑے بھگائے اور سب وہاں سے بھاگ نکلے۔
جیک اپنے باپ کی لاش کے پاس بیٹھا پھوٹ پھوٹ کر روتا رہا۔ اس کے کانوں میں کول کے آخری الفاظ بار بار گونج رہے تھے، جیسے وقت اُنہیں اس کے دل پر ہمیشہ کے لیے نقش کر رہا ہو۔ آنسو اس کے رخساروں پر بہہ رہے تھے، مگر اس کے اندر غم کے ساتھ ساتھ ایک اور آگ بھی بھڑک اٹھی تھی۔
اس کی سرخ آنکھوں میں انتقام کی چنگاریاں سلگنے لگی تھیں۔ وہ چارلی کا گلا گھونٹ دینا چاہتا تھا، اس کا خون بہا دینا چاہتا تھا، مگر حقیقت یہ تھی کہ وہ محض ایک بارہ سال کا بچہ تھا۔ اس کے ہاتھ خالی تھے اور اس کے سامنے کھڑا دشمن طاقتور۔
اسی لمحے اس نے اپنے دل میں ایک عہد باندھ لیا۔ وہ انتظار کرے گا، وقت کا انتظار۔ اور جب وقت آئے گا تو اپنے باپ کے خون کا حساب ضرور لے گا۔ پہلے ماں اس سے بچھڑ گئی تھی اور اب باپ بھی اسے تنہا چھوڑ گیا تھا۔ اس دنیا میں اس کا نہ کوئی سہارا باقی رہا تھا، نہ کوئی ہمدرد، نہ کوئی ایسا جو اس کے سر پر شفقت بھرا ہاتھ رکھتا۔
اس یتیم بچے نے اپنے باپ کے جنازے کے ساتھ گویا اپنے بچپن کا جنازہ بھی اُٹھا دیا تھا۔
اس کے بعد آنے والے بارہ سال اس نے انتقام کی آگ میں جلتے ہوئے گزارے۔ ہر دن اسے اپنے باپ کی یاد دلاتا، ہر رات اسے چارلی کا چہرہ دکھاتی۔ وقت گزرتا گیا، بچہ جوان ہو گیا، مگر اس کے دل میں جلنے والی آگ کبھی ٹھنڈی نہ پڑی۔
اور پھر آخرکار وہ دن آ پہنچا جس کا وہ بارہ برس سے انتظار کر رہا تھا۔
اپنے باپ کے خون کا حساب چکانے کا دن۔
✯✯✯✯✯
شام کب کی ڈھل چکی تھی۔ سورج اُفق کے پیچھے غروب ہو گیا تھا اور چاند اپنی مدھم چاندنی زمین پر بکھیر رہا تھا۔ قصبے کی گلیاں خاموش تھیں۔ چند گھنٹے پہلے گونجنے والی گولیوں کی آوازیں اب ماضی کا حصّہ بن چکی تھیں، مگر ان کی بازگشت ابھی بھی کچھ دلوں میں زندہ تھی۔
چارلی کی بے جان لاش زمین پر پڑی تھی۔ اس کے پاس اس کا کم عمر بیٹا گھٹنوں کے بل بیٹھا پھوٹ پھوٹ کر رو رہا تھا۔ اس کے کپڑے خون سے تر تھے اور آنسو مسلسل اس کے رخساروں پر بہہ رہے تھے۔
“تم نے میرے باپ کو کیوں مارا؟”
اس کی چیخ رات کی خاموشی کو چیرتی ہوئی دور تک پھیل گئی۔
جیک چند قدم کے فاصلے پر کھڑا یہ منظر دیکھ رہا تھا۔ اس کے چہرے پر نہ فتح کا احساس تھا، نہ سکون کا۔ اس کی نظریں اس بچے پر جمی تھیں جو اپنے باپ کی لاش سے لپٹ کر رو رہا تھا۔
اچانک اس کی آنکھوں کے سامنے ایک اور منظر اُبھر آیا۔
بارہ سال پہلے کا منظر۔
ایک بارہ سالہ بچہ اپنے باپ کی لاش کے پاس بیٹھا چیخ چیخ کر رو رہا تھا۔ اس کے ہاتھ خون سے رنگے ہوئے تھے اور اس کی دنیا اس کے سامنے بکھر چکی تھی۔
وہ بچہ جیک خود تھا۔
اسے یاد آیا کہ کس طرح کول کی موت کے بعد اس کی زندگی یکسر بدل گئی تھی۔ کس طرح ہر رات باپ کی یاد میں آنکھوں ہی آنکھوں میں گزر جاتی تھی۔ کس طرح اس نے لوگوں کے رحم، تنہائی، بھوک، خوف اور بے بسی کو قریب سے دیکھا تھا۔ اسے یاد آیا کہ باپ کے جنازے کے ساتھ اس کا بچپن بھی دفن ہو گیا تھا۔ اور اب… اب وہی درد کسی اور بچے کی آنکھوں میں تھا۔
جیک نے چارلی کے بیٹے کی طرف دیکھا۔ اُسے یوں محسوس ہوا جیسے وہ خود کو بارہ سال پہلے دیکھ رہا ہو۔
اس بچے کا بھی باپ اس سے چھن گیا تھا۔۔ اس کی زندگی بھی آج سے بدلنے والی تھی۔ اس کے خواب، اس کی ہنسی، اس کا بچپن… سب کچھ۔۔۔
یہ سوچ کر جیک کے سینے میں ایک عجیب سا بوجھ اُترنے لگا۔ انتقام کی آگ، جسے وہ بارہ سال سے اپنے اندر پال رہا تھا، اچانک ٹھنڈی پڑتی محسوس ہوئی۔
اگلے ہی لمحے وہ چونک کر اُٹھ بیٹھا۔ وہ خواب سے بیدار ہوا۔ یہ اس کا خواب تھا۔ اس کی سانس تیزی سے چل رہی تھی۔ چہرہ پسینے سے بھیگا ہوا تھا۔ چند لمحے اسے سمجھ ہی نہ آیا کہ وہ کہاں ہے۔ پھر اس کی نظر غار کی پتھریلی دیواروں پر پڑی۔ وہ غار ہی میں تھا۔ وہی غار جہاں قتل کے بعد پناہ لینے آیا تھا۔ اس نے لرزتے ہوئے اپنے ہاتھوں کی طرف دیکھا۔ اسے یوں محسوس ہوا جیسے اس کی ہتھیلیوں پر اب بھی چارلی کا خون لگا ہو۔ وہ گھبرا کر اپنے ہاتھ رگڑنے لگا، مگر دل پر لگے دھبے دھلنے کا نام نہیں لے رہے تھے۔
اچانک اس کے ذہن میں ایک اور منظر بجلی کی طرح کوند گیا۔
چارلی زمین پر گرا ہوا تھا۔ وہ اس کے سر پر پستول تانے کھڑا تھا۔ اور پھر… ایک کے بعد ایک گولیاں۔ اس کے کانوں میں گولیوں کی آوازیں دوبارہ گونجنے لگیں۔ اسی لمحے اسے یاد آیا کہ دکان کا شٹر اچانک اوپر اٹھا تھا۔ شٹر کے پیچھے ایک لڑکا کھڑا تھا۔ چارلی کا بیٹا۔ وہ بے بسی سے اپنے باپ کو مرتا ہوا دیکھ رہا تھا۔ اس کی آنکھوں میں وہی خوف تھا… وہی درد… وہی بے بسی… جو بارہ سال پہلے جیک کی آنکھوں میں تھی، جب اس نے اپنے باپ کو اپنے سامنے دم توڑتے دیکھا تھا۔
جیک نے دونوں ہاتھوں سے اپنا سر پکڑ لیا۔ اسے پہلی بار محسوس ہوا کہ انتقام نے ایک زخم تو بھر دیا ہے، مگر ایک نیا زخم بھی پیدا کر دیا ہے۔ وہ بارہ سال پہلے والا یتیم بچہ تو نہیں رہا تھا، مگر آج ایک اور بچہ یتیم ہو گیا تھا۔ غار میں مکمل خاموشی تھی۔ صرف جیک کی بے ترتیب سانسوں کی آواز گونج رہی تھی، اور اس کے دل میں پہلی بار یہ سوال جنم لے رہا تھا کہ کیا واقعی اس نے اپنے باپ کے خون کا حساب چکا دیا تھا، یا پھر اس نے صرف درد کی ایک نئی داستان کو جنم دیا تھا؟
اب اس کے خواب میں بھی چارلی کی موت اور حقیقت میں بھی پچھتاوا ہو رہا تھا۔ وہ جب بھی سوتا اس کا ہر خواب چارلی کے خون سے رنگا ہوتا اور جب بھی جاگتا تو چارلی کے بیٹے کا چہرہ اس کے سامنے رہتا۔
جیک کو اپنی غلطی پر اب پچھتاوا ہو رہا تھا۔ مگر اب پچھتاوے کا وقت نہیں رہا تھا اس کے دل میں جو انتقام کی آگ تھی وہ چارلی کی موت کے بعد اس کے بچے کا حساب دیکھ کر بالکل ٹھنڈی پڑ چکی تھی۔ لوگ یہ کیوں نہیں سوچتے کہ جو ہو چکا وہ ہو چکا اب کچھ بھی پہلے کی طرح نہیں کیا جا سکتا۔ ہم جتنا بھی لڑ لیں جھگڑ لیں کیوں نہ دوسرے کی جان بھی لے لیں لیکن پھر بھی کچھ پہلے کی طرح نہیں ہو سکتا بلکہ مزید دشمنی اور نفرت بڑھتی ہے۔
“اگر چارلی نے ہماری زمینوں کی خاطر میرے باپ کو قتل کیا تھا… تو کیا میں بھی اس سے مختلف ہوں؟ کیا میں بھی اتنا ہی ظالم ہوں جتنا وہ تھا؟”
جیک غار کے ایک کونے میں گھٹنوں کے بل بیٹھا خود سے سوال کر رہا تھا۔ اس کی نظریں پتھریلی زمین پر جمی تھیں، مگر اس کا ذہن کہیں اور بھٹک رہا تھا۔ چاروں طرف خاموشی تھی، مگر اس کے اندر سوالوں کا ایک طوفان برپا تھا۔
“اس نے تو لالچ میں قتل کیا تھا… مگر مجھے کس چیز کا لالچ تھا؟”
اس نے سر اٹھا کر تاریکی میں دیکھا، جیسے وہاں سے کسی جواب کی امید ہو۔
“میں نے کیوں قتل کیا؟”
اس کے ہونٹ کانپے۔
“شاید اس لیے کہ مجھے اپنے باپ کے خون کا بدلہ لینا تھا… شاید اس بچپن کا بدلہ جو میرے سامنے دفن ہو گیا تھا… یا شاید ان تمام راتوں کا، جو میں نے تنہائی اور درد میں گزاری تھیں۔”
اس نے گہری سانس لی اور دونوں ہاتھوں سے اپنا چہرہ ڈھانپ لیا۔
“بارہ سال… پورے بارہ سال میں نے اسی دن کا انتظار کیا تھا۔ میں سمجھتا تھا کہ چارلی کی موت کے بعد میرے دل کو سکون مل جائے گا۔ میں سمجھتا تھا کہ میرا غصہ ختم ہو جائے گا۔ مگر…”
اس کی آواز بھر گئی۔
“مگر مجھے سکون کیوں نہیں ملا؟”
غار ایک بار پھر خاموش ہو گئی۔
صرف اس کی بے ترتیب سانسوں کی آواز سنائی دے رہی تھی۔
اچانک چارلی کے بیٹے کا چہرہ اس کی آنکھوں کے سامنے آ گیا۔ وہی آنسوؤں سے بھری آنکھیں، وہی لرزتی ہوئی آواز، وہی بے بسی۔
“مگر چارلی کے بیٹے کا کیا؟”
جیک نے سر اٹھایا۔
“اس کا کیا قصور تھا؟”
اس کی آواز میں درد گھل گیا۔
“اس نے تو میرا باپ نہیں مارا تھا… اس نے تو میری زمینیں نہیں چھینی تھیں… پھر اسے وہ سزا کیوں ملی جو مجھے ملی تھی؟”
اس کے ذہن میں ایک بار پھر وہ منظر گھوم گیا؛ نوآ اپنے باپ کی لاش سے لپٹا رو رہا تھا۔
“میں نے اپنے باپ کو کھویا… اور آج میں نے اس سے اس کا باپ چھین لیا۔ ”
اس کے الفاظ غار کی دیواروں سے ٹکرا کر واپس لوٹ آئے۔
“تو پھر فرق کیا رہ گیا مجھ میں اور چارلی میں؟”
اس سوال کے بعد وہ خاموش ہو گیا۔
ایسی خاموشی، جس میں انسان اپنے ہی ضمیر کی آواز سننے لگتا ہے۔
جیک نے اپنا سر دیوار سے ٹکا دیا اور آنکھیں بند کر لیں۔ پہلی بار اسے محسوس ہوا کہ انتقام کی آگ نے چارلی کو تو جلا دیا تھا، مگر اس کی لپیٹ میں وہ خود بھی آ چکا تھا۔
اور اب اس کے دل میں سب سے بڑا سوال یہ نہیں تھا کہ اس نے بدلہ لے لیا یا نہیں… بلکہ یہ تھا کہ اس بدلے کی قیمت کس نے ادا کی ؟
✯✯✯✯✯
دو ہفتے گزر چکے تھے۔۔۔
دو طویل، بے چین اور اذیت ناک ہفتے۔۔۔
جیک اب بھی اسی غار میں رہ رہا تھا۔ دن میں وہ کبھی غار کے دہانے پر بیٹھ کر دور پھیلے میدانوں کو تکتا رہتا اور رات کو جاگتے جاگتے صبح کر دیتا۔ بارہ سال تک جس انتقام کو وہ اپنی زندگی کا مقصد سمجھتا رہا تھا، اسے پورا کرنے کے بعد بھی اس کے دل کو سکون نہ ملا تھا۔
ہر رات ایک ہی منظر اس کے ذہن میں لوٹ آتا۔
نوآ اپنے باپ کی لاش سے لپٹا رو رہا تھا۔
کبھی اسے اپنا بارہ سالہ وجود نظر آتا اور کبھی نوآ کا چہرہ۔
دونوں ایک دوسرے میں گھُل مِل گئے تھے۔
ایک صبح وہ غار کے باہر بیٹھا طلوع ہوتے سورج کو دیکھ رہا تھا کہ اچانک اس کے ذہن میں ایک خیال آیا۔
“میں یہاں بیٹھ کر اپنے سوالوں کے جواب نہیں ڈھونڈ سکتا۔”
اس نے خود سے کہا۔
“اگر میں واقعی جاننا چاہتا ہوں کہ میں کون بن چکا ہوں، تو مجھے اس بچے کا سامنا کرنا ہوگا۔”
اسی دن جیک نے اپنا گھوڑا تیار کیا اور قصبے کی طرف روانہ ہو گیا۔
سفر کے دوران اس کے دل کی دھڑکن مسلسل تیز رہی۔ اسے معلوم نہیں تھا کہ نوآ اسے دیکھ کر کیا ردِعمل دے گا۔ نفرت؟ غصہ؟ خوف؟
شاید سب کچھ۔
دوپہر کے وقت وہ قصبے میں داخل ہوا۔
وہی پرانی گلیاں، وہی لکڑی کی دکانیں اور وہی گرد آلود سڑکیں۔ کچھ دیر بعد وہ اس دکان کے سامنے پہنچ گیا جو کبھی چارلی کی تھی۔ اس نے دور کھڑے ہو کر اندر جھانکا۔ دکان کے اندر نوآ اور اس کی ماں موجود تھے۔
نوآ گاہکوں کو سامان دے رہا تھا جبکہ اس کی ماں حساب کتاب میں مصروف تھی۔ دونوں کے چہروں پر تھکن نمایاں تھی۔ دونوں اپنی ذمہ داریوں میں اُلجھے ہوئے تھے جیسے وقت نے اچانک ان سے بچپن اور سکون دونوں چھین لیے ہوں۔ ایسا لگتا تھا جیسے گزشتہ دو ہفتوں میں ان پر کئی سال گزر گئے ہوں۔
جیک نے ایک گہری سانس لی۔
وہ ابھی آگے بڑھنے ہی والا تھا کہ اچانک دو مسلح آدمی دکان کے اندر داخل ہوئے۔
ان کے چہروں پر کپڑا بندھا ہوا تھا۔
“جو کچھ بھی ہے، ہمارے حوالے کر دو!”
ان میں سے ایک نے بلند آواز میں کہا۔
دکان میں موجود چند گاہک خوفزدہ ہو کر ایک طرف ہٹ گئے۔
نوآ کی ماں گھبرا گئی۔
“ہمارے پاس زیادہ پیسہ نہیں ہے،” اس نے لرزتی ہوئی آواز میں کہا۔
“جو ہے، وہی نکالو!”
دوسرے آدمی نے دھمکی آمیز لہجے میں جواب دیا۔
نوآ فوراً اپنی ماں کے سامنے آ کر کھڑا ہو گیا۔
جیک نے یہ منظر دیکھا تو اس کے قدم خود بخود آگے بڑھ گئے۔
اسے اچانک اپنا بچپن یاد آ گیا۔ وہ بھی تو اپنے باپ کو بچانا چاہتا تھا۔ وہ بھی تو بے بس کھڑا تھا۔ جیک دکان کے دروازے تک پہنچا۔
“لڑکے اور اس کی ماں کو چھوڑ دو۔”
اس کی آواز پرسکون مگر مضبوط تھی۔
دونوں آدمیوں نے مڑ کر اس کی طرف دیکھا۔
“اور تم کون ہوتے ہو درمیان میں بولنے والے؟”
ایک ڈاکو نے طنز سے کہا۔
جیک نے کوئی جواب نہ دیا۔
وہ آہستہ آہستہ ان کی طرف بڑھنے لگا۔
اگلے چند لمحوں میں دکان کے اندر ہلچل مچ گئی۔ جیک نے نہایت پھرتی سے دونوں حملہ آوروں کا مقابلہ کیا۔ اچانک صورتحال اپنے خلاف دیکھ کر ایک آدمی بھاگ نکلا جبکہ دوسرا بھی اپنے ساتھی کے پیچھے دوڑ گیا۔
چند ہی لمحوں میں دونوں قصبے کی گلیوں میں غائب ہو چکے تھے۔ دکان میں خاموشی چھا گئی۔ سب کی نظریں جیک پر تھیں۔ نوآ کی ماں نے تشکر بھرے لہجے میں کہا:
“آپ نے ہماری جان بچائی ہے۔ ہم آپ کا یہ احسان کبھی نہیں بھولیں گے۔”
جیک نے پہلی بار ان کی طرف براہِ راست دیکھا۔
اس کی نظریں نوآ پر جا ٹھہریں۔ نوآ بھی اسے پہچان چکا تھا۔ چند لمحوں تک دونوں خاموش رہے۔ جیک کے دل پر ایک بوجھ سا آ گیا۔
“میں تم سے ایک سچ کہنا چاہتا ہوں۔”
اس نے دھیرے سے کہا۔
نوآ کی ماں حیرت سے اسے دیکھنے لگی۔ جیک نے نظریں جھکا لیں۔
“تمہارے شوہر کو جس شخص نے مارا تھا…”
اس کی آواز بھاری ہو گئی۔
“وہ میں تھا۔”
دکان میں ایک دم خاموشی چھا گئی۔
نوآ کی ماں کے چہرے کا رنگ بدل گیا جبکہ نوآ ساکت کھڑا رہ گیا۔
جیک نے سر جھکا لیا۔
“میں معافی کا حق دار نہیں ہوں۔ میں صرف اتنا جانتا ہوں کہ میں نے ایک بچے سے اس کا باپ چھین لیا، بالکل ویسے ہی جیسے برسوں پہلے کسی نے مجھ سے میرا باپ چھین لیا تھا۔”
اس کی آنکھیں نم ہو گئیں۔
“میں وقت کو واپس نہیں لا سکتا، مگر اگر تم اجازت دو تو میں اپنی باقی زندگی تم دونوں کی مدد کرنے میں گزارنا چاہتا ہوں۔”
نوآ خاموشی سے اسے دیکھتا رہا۔ پھر اس نے اپنی ماں کی طرف دیکھا۔ اس کی ماں کی آنکھوں میں بھی آنسو تھے۔
شام ڈھلنے لگی تھی۔ سورج آہستہ آہستہ اُفق کے پیچھے اتر رہا تھا اور اس کی سرخی پورے قصبے پر پھیل گئی تھی۔ دکان کے سامنے کی سڑک پر گرد اڑ رہی تھی اور ہوا کے جھونکے لکڑی کے سائن بورڈ کو ہلکا ہلکا ہلا رہے تھے۔ دکان کے اندر خاموشی طاری تھی۔
جیک کا اعتراف سننے کے بعد نہ نوآ کچھ بولا اور نہ ہی اس کی ماں۔ تینوں کے درمیان ایک ایسی خاموشی حائل ہو گئی تھی جسے الفاظ توڑ نہیں سکتے تھے۔ جیک نے آہستہ سے نظریں جھکا لیں۔
“میں جانتا ہوں کہ میرے پاس اپنے جرم کا کوئی جواز نہیں ہے۔”
اس کی آواز بوجھل تھی۔
“میں یہ بھی جانتا ہوں کہ میں تمہارا باپ واپس نہیں لا سکتا۔”
نوآ کی آنکھوں میں آنسو بھر آئے۔
“تو پھر آپ یہاں کیوں آئے ہیں؟”
اس نے بھری ہوئی آواز میں پوچھا۔
یہ سوال سن کر جیک چند لمحوں کے لیے خاموش ہو گیا۔ کیونکہ اس کے پاس واقعی کوئی جواب نہیں تھا۔ وہ صرف اتنا جانتا تھا کہ دو ہفتوں سے اسے نیند نہیں آ رہی تھی۔ دو ہفتوں سے اسے اپنے باپ کی لاش اور نوآ کے آنسو ایک ساتھ دکھائی دے رہے تھے۔ دو ہفتوں سے اسے محسوس ہو رہا تھا کہ چارلی کو مارنے کے بعد بھی اس کے اندر کا خالی پن ویسا ہی ہے۔
“شاید…”
اس نے بمشکل الفاظ ادا کیے۔
“شاید اس لیے آیا ہوں کیونکہ میں خود سے نظریں نہیں ملا پا رہا۔”
نوآ کی ماں نے سر جھکا لیا۔
اس کی آنکھوں سے خاموشی سے آنسو بہہ رہے تھے۔ جیک نے جیب میں ہاتھ ڈالا اور ایک پرانا رومال نکالا۔ اس رومال پر وقت کے ساتھ ماند پڑ چکے خون کے چند دھبے موجود تھے۔ یہ کول کا رومال تھا۔ وہی رومال جو اس کے باپ کی موت کے دن اس کے ہاتھ میں تھا۔
جیک نے اسے چند لمحے دیکھا اور پھر نوآ کے سامنے رکھ دیا۔
“بارہ سال پہلے میں بھی تمہاری جگہ کھڑا تھا۔”
اس کی آواز لرز گئی۔
“میں بھی اپنے باپ کی لاش کے پاس بیٹھا رو رہا تھا۔”
نوآ کی آنکھیں جیک پر جم گئیں۔
“اور آج میں نے تمہیں وہی درد دے دیا۔”
یہ کہتے کہتے جیک کی آواز ٹوٹ گئی۔ دکان میں ایک بار پھر خاموشی چھا گئی۔ باہر سورج تقریباً غروب ہو چکا تھا۔ دکان کے دروازے سے اندر آتی روشنی آہستہ آہستہ مدھم پڑ رہی تھی۔
جیک نے آہستہ سے اپنی ٹوپی اٹھائی اور دروازے کی طرف بڑھ گیا۔
وہ جانتا تھا کہ کچھ زخم ایسے ہوتے ہیں جنہیں معافی بھی فوراً نہیں بھر سکتی۔
دروازے تک پہنچ کر وہ رکا۔
اس نے آخری بار مڑ کر نوآ کو دیکھا۔ اس بچے کی آنکھوں میں اسے اپنا بارہ سالہ وجود نظر آیا۔
وہی بے بسی۔۔۔۔ وہی درد۔۔۔۔ وہی ٹوٹا ہوا بچپن۔۔۔۔
جیک کی آنکھوں سے ایک آنسو نکل کر رخسار پر بہہ گیا۔ پھر وہ خاموشی سے دکان سے باہر نکل گیا۔ شام مکمل طور پر رات میں بدل چکی تھی۔ چاند آسمان پر نمودار ہو چکا تھا اور قصبے کی سنسان گلیوں پر اپنی مدھم روشنی بکھیر رہا تھا۔
جیک آہستہ آہستہ چلتا ہوا قصبے سے باہر نکل گیا۔ اس کے قدم بھاری تھے۔
انتقام کی منزل تک پہنچنے میں اسے بارہ سال لگے تھے۔ مگر اب اسے احساس ہوا تھا کہ انتقام منزل نہیں ہوتا۔ وہ صرف ایک زخم کو دوسرے زخم سے بدل دیتا ہے۔ دور کہیں ہوا کا ایک جھونکا چلا۔ جیک نے آسمان کی طرف دیکھا۔ اسے یوں محسوس ہوا جیسے بارہ سال پہلے مرنے والا بچہ اور آج زندہ رہ جانے والا آدمی، دونوں اس کے اندر کہیں خاموش کھڑے ہوں۔
اور ان دونوں کے درمیان صرف ایک چیز زندہ ہے۔۔۔ درد۔۔۔
وہ درد جو ایک باپ کے قتل سے شروع ہوا تھا اور نسلوں کے سینوں میں اُتر گیا تھا۔ وہ درد جو ایک باپ کے قتل سے جنم لیا تھا اور ایک بیٹے کے آنسوؤں تک سفر کرتے ہوئے جیک کے ضمیر میں گھر کر گیا تھا۔
اس رات جیک نے پہلی بار سمجھا کہ بعض اوقات انتقام دشمن کو نہیں مارتا ، بلکہ انسان کے اندر بچی ہوئی آخری سکون کی کرن کو مار دیتا ہے۔
✯✯✯✯✯
ختم شد۔۔۔